Bertzetik, hizkuntzaren normalizazioaren ardura pertsonen eta entitateen artean partekatua denez, 2019an, mota guzietako entitateek euskararen erabilera babesteko eta bultzatzeko neurriak hartzea izanen da helburua.
Euskaraldia Beran antolatzeko talde bat hasia da lanean, joan den martxoaren 23an Bortzirietako herritarrekin Toki Ona institutuan egindako bileran osatu baitzen batzordea. Lanak antolatzeko tenorea da orain, eta taldea zabaltzeko beharra azpimarratu dute. Horretarako, lehenbiziko bileran parte hartzera deitu dituzte Berako euskaltzale guztiak. Hitzordua heldu den apirilaren 17an izanen da, asteartearekin, 19:30ean, Beralandetan.
Euskal hiztunen aktibazioa helburu: ‘11 egun euskaraz’
Aktibazioak martxan paratzea erran nahi du. Hizkuntzaren erabilerari lotutako kontzeptua da, euskaraz solas egiten dakitenek edota euskara ulertzeko gaitasuna dutenek euskara erabil dezaten lortu nahi dugulako.
Hamaika egun horietan, 16 urtetik goitiko herritarrak Ahobizi eta Belarriprest bihurtu nahi ditugu. Ahobizi ulertzen duten guztiei euskaraz hitz egiten dieten lagunak dira (baita ezezagunei lehen hitza, gutienez, euskaraz egiten dietenak ere). Belarriprest, berriz, gutienez euskara ulertzen duten kideak dira, gainontzekoei euskaraz aritzeko gonbidapena luzatzen dietenak.
Ekimena Euskal Herri osoan eginen da, baina, tokian tokiko euskaltzaleak izanen dira herri bakoitzeko dinamiken sustatzaileak, eta tokiko inguru soziolinguistikora zein errealitatera moldatzeko modukoa izanen da.
Euskalgintza eta erakunde publikoak elkarrekin
Euskararen inguruan Euskal Herri osoan ematen hasi den elkarlanerako dinamika herriz herri zabalduko du Euskaraldiak. Izan ere, sustatzaileen artean daude euskalgintzako eragile nagusiak, hala nola, Euskaltzaileen Topagunea, IKA euskaltegiak, Berria, AEK, Elhuyar, Ikastolen Elkartea, Kontseilua, Sortzen, Tokikom edota UEMA; eta baita erakunde publiko nagusiak, tartean, Nafarroako Gobernua - Euskarabidea, Eusko Jaurlaritza edota Ipar Euskal Herriko Euskararen Erakunde Publikoa bera, bertze anitzen artean.