Ostatu eta jatetxea bere horretan moldatzeko aurrekontua garesti samarra iduritzeaz gain, benetako arazoa berriz ere erabat moldatu gabe geldituko liratekeela pentsatu dute. Azkenean, etxea barrendik hustutzearen aldeko erabakia hartu eta arazoak behin-betiko moldatzera bideratu dituzte indarrak.
Biltoki elkartearen egoitza Elizatera eramateko proposamena
Bide batez, eskolari leku arazoa moldatzeko eranskin gehiago paratu gabe, proposamena luzatu diote Biltoki elkarteari: euren egoitza Elizateara eramatea, berritze-lanak egin ondotik bertan izanen den lekua aprobetxatuz. Udalaren proposamenari erantzun bat emateko lehen hausnarketak egiten ari da orain elkartea. Pentsatzekoa da azken erantzuna bazkide guzien artean egindako batzar batetik aterako dela. Biltokik orain dituen aretoak eskolak hartuko lituzke modu horretara, bere erabilerarako egokitzeko.
Oraindik gaia hasierako fasean dagoenez, ez dago xehetasun gehiagorik aipatzerik, baina Udalbatzaren asmoa irmoa da, Herriko Etxea dagoen egoeran, guziz bideragarria iduritzen zaie proiektua.