erran.eus

Igor Portu eta Mattin Sarasolaren tortura kasuaren epaiaren inguruko mozioa onartu du ahobatez Lesakako Udalak

  Gertaerak  Bortziriak  Lesaka

Herriko Etxearen ustez «aitzinera egin behar dugu behingoagatik giza eskubideen urraketa hau gelditu dadin eta urtetan torturatzaileek izan duten zigorgabetasuna bukatu dadin»

Tortura kasuak ikertzeko eta azaleratzeko beharra agertzeko eta tortura pairatu duten herritarrei elkartasuna eta babesa azaltzeko mozioa aurkeztu zuen Lesakako EH Bilduko udal taldeak otsailaren 23ko udal batzarrera eta ahobatez onartu zen, Geroa Bai eta EHBilduko zinegotzien botuekin.

Igor Portu eta Mattin Sarasolaren tortura kasuaren epaiaren inguruko mozioa onartu du ahobatez Lesakako Udalak
Torturaren kontrako elkarretaratpea Lesakan 2008an, Portu eta Sarasola atxilotu ondotik. | Ikusi handiago | Argazki originala

Otsailaren 13an, Torturaren aurkako egunean, Estrasburgoko Auzitegiak, historian lehen aldiz  Espainiar Estatua zigortu zuen Igor Portu eta Mattin Sarasola lesakarrekin tratu txar eta ankerra erabiltzeagatik.

Lesakako EH Bildutik gogor salatu du “bai Igor eta Mattinek, eta baita bertze hainbertze pertsonek ere jasandako tratua Espainiar Estatuaren partetik. Epai honek argi uzten du Espainian Estatuaren jarduna eta giza eskubideen urraketa”. Beraz, EH Bilduk uste du badela garaia egindakoa onartzeko eta aurretik gertatutako tortura salaketa kasu guztiak argitzeko. “Ez hori bakarrik, behingoagatik horrelakorik berriz ez gertatzeko beharrezko mekanismo eta neurriak martxan jartzeko garaia dela uste dugu”, dio oharrean.

 

Honengatik guziarengatik, Lesakako EH Bilduk mozio bat aurkeztu zuen otsailaren 23an Lesakako Herriko Etxean egindako osoko bilkuran lantzeko eta ahobatez onartu ziren, bai EHBildu, baita Geroa Bairen aldeko bozekin.

Igor eta Mattin lesakarrak direnez eta beraz kasu honek eragin berezia duenez lesakarrengan, zenbait konpromiso hartu zituen Udalabatzak.

 

Lehenengo puntuan, «Lesakako Udalak tortura kasuak ikertzeko eta azaleratzeko beharra» agertu zuen eta tortura pairatu duten herritarrei elkartasuna eta babesa azaldu zien. Era berean, egia, aitortza eta erreparaziorako daukaten eskubidean laguntzeko bere prestutasuna agertu du Lesakako Udalak.

Bigarren puntuan, Lesakako Udalak Nafarroako Gobernuari eskatu dio dio torturaren gaia azaleratzen eta biktimak erreparatzen laguntzeko bere esku dagoen guztia egin dezan, eta bide horretan egiten ari den eta eginen dituen urratsei babesa eman die. 

Hirugarrenean, Lesakako Udalak Espainiar Estatuari, behingoagatik tortura eta tratu txarren kasuetan, eta bereziki Igor Portu eta Mattin Sarasola lesakarren kasuan izandako ardura onartzea eskatu dio, eta aldi berean, gaia azaleratzen eta biktimak erreparatzen laguntzeko bere esku dagoen guztia egin dezala. Era berean mekanismoak martxan jarri ditzala holakorik berriz ere gerta ez dadin. Hartara, torturak dokumentatzeko egitasmoaren garrantzia eta beharra azpimarratu du Lesakako Udalak. 

Lesakako Udalak, erabaki hauen berri emanen du, Nafarroako Gobernuari eta Espainiako Gobernuari, eta Lesakako herritarrei ere jakinaraziko dielarik.

Lesakako EHBildurentzat, mozio hau onartzeak garrantzia handia du eta Estrasburgoko Auzitegiaren ebazpenak, «Espainiar Estatuaren aldetik tortura existitu dela adierazten du, urtetan erabili duen argudioa, hau da atxilotuen tratu txarren salaketa sistematikoa zela, bertan behera uzten du». Nazioartetik heldu den lehen urrats honi helduz, EHBilduren ustez, «aitzinera egin behar dugu behingoagatik giza eskubideen urraketa hau gelditu dadin eta urtetan torturatzaileek izan duten zigorgabetasuna bukatu dadin. Bada garaia pertsona hauen guztien eskubideak bermatzeko instituzioek duten ardurari heltzeko».

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa