Donostiako Goratzar abesbatzak kantatu eta Loreto Aramendik joko du organoa larunbatean 19:30ean
Joan den urte bukaeran, egoera kaskarrean dagoen Lesakako San Martin elizako organoa zaharberritzen hasteko dirua biltzeko kontzertua egin zen. Helburu horrekin segitu nahi du aurten ere talde batek (tartean Iratxe Etxarte eta Agustin Arriola organujoleak, Marisol Perez abesbatzako zuzendaria eta Gabi Igarzabal kidea) eta horretarako bertze kontzertu bat antolatu dute otsailaren 24an, larunbatean 19:30ean elizan.
Donostiako Goratzar abesbatzak kantatuko du, Olatz Egibururen zuzendaritzapean, Suzanna Guterik txirula joko du eta Loreto Aramendi organujoleak joko du. Sarrera librea da, baina kontuan hartuz helburua organoa konpontzeko dirua biltzea dela, entzuleek eskain dezaketen laguntza ere eskertuko dute antolatzaileek.
Kultur Intereseko Ondasun izendatua dagoen organo erromantikoa 1891. urtean egin zuten Zaragozako Roqués anaiek eta 1950-51n moldatu zuen Amezua y Cíak.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
