Urtarrilaren 28an ezustea eman zuen Beti Gazteko korrikalariak eta lehen aldiz distantzia honetako podium batera igo da
Beti Gazteko Bixente Igartzabal kirolari lesakarrak ezuste handia eman du urtarrilaren 28an Tarragonako Maratoian (Katalunia). Izan ere, lehen aldiz distantzia honetako lasterketa bateko podiumera igotzea lortu du, hirugarren postua eskuratuta. 42 kilometro eta 192 metroak egiteko bi ordu, 44 minutu eta 10 segundo behar izan zituen Igartzabalek.
Maratoian 425 korrikalarik emana zuten izena eta horien artean hirugarren izan zen, beraz, triatloian espezialdua dagoen Beti Gazteko atleta. Iaz bezala, Pedro Nimo galiziarra suertatu zen garaile (2:29.24).
Proba nagusiaz gain, 30 kilometroko lasterketa ere izan zen igandean Tarragonan. Honetan, Jose Luis Irurtzun lesakarra aritu zen eta 125. postua eskuratu zuen, lasterketa bukatu zuten 309 korrikalarien artean. Bi ordu, 27 minutu eta 54 segundo behar izan zituen.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.