erran.eus

Ternuan ibili ziren arrantzaleen inguruko solasaldia eta dokumentalaren emanaldia bi egunez eskainiko dute Beran

  Kultura  Bortziriak  Bera

Otsailaren 17rako sarrerak agortu direnez, otsailaren 18an ere eginen dute Kultur Etxean

Bortziritarrak Ternuan izenburupean, arratsalde-pasa polita antolatua zuen Berako  Kultur Batzordeak otsailaren 17an. Datorren larunbaterako sarrerak guztiak agortu dira, ordea, eta horregatik, otsailaren 18an, igandean ere gure itsas-arrantzaleen berri izateko aukera eskainiko dute.

Ternuan ibili ziren arrantzaleen inguruko solasaldia eta dokumentalaren emanaldia bi egunez eskainiko dute Beran
Berako arrantzaleak, Punta Sabinal itsasontzeko tripulazioan. | Ikusi handiago | Argazki originala

 

Larunbatean nahiz igandean 18:00etan Bortziritarrak Ternuako bakailao-arrantzan solasaldia eskainiko du Rosa Arburuak euskaraz. Ondotik, Olivier Van der Zee-k zuzendutako Arte al agua dokumentala (gazteleraz) eskainiko dute. Larunbaterako sarrerak agortu ondotik, igandekoak aitzinetik salgai daude Agara prentsa dendan, 3 eurotan.

1941 eta 1960 urteen artean Bortzirietako 158 gizonek atera zuten kartilla Ternuara arrantzara joateko: 70 beratar, 55 lesakar, 17 etxalartar, 11 igantziar eta 5 aranaztar. Gerra ondoko Bortzirietako ekonomia ahulean, Ameriketara artzain lanetara, Iratira eta Frantziara mendi-mutil; kontrabandoa; neskato-lanak; apaiz eta moja; edota Ternuara bakailao-arrantzara joan behar izan zuten gazte anitzek, bizimodua aitzinera atera ahal izateko. 

Berriki estreinatu den Arte al agua Pasaian bizi den Olivier Van der Zee holandarraren dokumentala Beran ikusi ahal izanen da, otsailaren 17an, larunbatez, eta horren aitzakian, dokumentaleko protagonistak bezala Beratik itsasora lanera joan ziren gizonei aitortza egin nahi die Berako Udalak. Emanaldia edozein pertsonari irekia dago, baina, bereziki, dei egiten zaie arrantzale izandakoei bertaratu daitezen, eta dokumentalaren ondotik euren bizipenak kontatzeko aukera izanen dute.

 

Dokumentalaren aitzinetik Rosa Arburua Goienetxeren hitzaldia izanen da, kultur etxean bertan, Bortziritarrak Ternuan bakailao-arrantzan gaia hizpide hartuta. Rosa Arburuak 1940-1960 Bortzirietako Gaztik liburua argitaratu zuen 2005ean. Bertan, 1940 eta 1960 urteen artean Bortzirietatik kanpo lan bila joan ziren gizon-emakumeen bizipenak biltzen ditu liburuan, tartean Ternuara bakailao-arrantzara joandakoena. Liburuaren zati horren inguruko solasaldia eskainiko du EHUko irakasleak.

2018/02/17 - 2018/02/18

Berako Kultur Etxea | Bera

Ekitaldi gehiago »»

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa