Estresa kudeatzeko hiru tailer antolatu dituzte Lesakan

Ttipi-Ttapa 2018ko urt. 17a, 06:49

Otsailaren 20an, otsailaren 27an eta martxoaren 6an izanen dira eta izena osasun zentroan eman behar da

Lesakako Osasun Zentroak estresa kudeatzeko hiru tailer antolatu ditu, otsailaren 20an, otsailaren 27an eta martxoaren 6an, 11:00etatik 12:30era bitarte. Saioak osasun zentroaren parean Udalak duen erabilera anitzetarako aretoan izanen dira. 

Izena emateko osasun zentrora joan behar da. Bertzalde, lantalde gehiago egiteko asmoa dutenez, ordutegi edo egun horietan saioetara aukerarik ez duten interesdunek ere izena emateko deia egin dute. 

 

Zer da estresa?

Estresa tentsio fisiko edo emozionalak eragindako sentimendua da. Urduritasunak, amorrazioak edo frustrazioak eragindako edozein egoera edo pentsamendu izan dezake jatorrian. Neurri ttikian estresak onurak eragin ditzake, gizakiak arriskuaz ohartu eta horiek saihesteko edota gauzak tenorez egiteko prestatzen baititu. Bertzalde, estresak aunitz irauten duenean, osasunean kalte larriak eragin ditzake. 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun