Euskararen egunaren harira, hainbat ekitaldi antolatu dituzte Irain ikastetxean. Eskola orduetan hasitako ospakizuna ilunabarrera arte luzatuko da.
Abenduaren 3an, igandean, han eta hemen ospatu zen Euskararen Nazioarteko Eguna eta beraz, igandea izaki, ikastetxeetan egunean bertan jorratzea ezinezkoa izan zen. Aitzitik, eskualdeko ikastetxe zenbaitek ez dute urteko egun seinalatuak merezi duen oihartzuna eskaini gabe pasatzerik nahi. Hori horrela, Lesakako Irain eskolako Guraso Elkarteak, eskolako zuzendaritza eta irakasle taldearekin elkarlanean, abenduaren 7rako hainbat ekitaldi antolatu ditu.
Eskola orduetan euskararen lanketa egiteaz gainera, arratsaldean besta giroan murgilduko dira ttiki eta handiak. Izan ere, eskolako sarrerako aterpean, hotzari aurre hartzeko eta gorputzak berotzeko txokolate beroa eta gaztainak izanen dituzte. Taloak nahiago dituenak, jateko ez ezik, egiten ikasteko aukera ere izanen du. Azkenik, ospakizuna kantuan bukatzeko euskaraokea izanen dute. Bien bitartean, 16:00etatik 18:00etara, pinak salgai izanen dira. Guraso Elkarteak bestan parte hartzeko gonbidapena luzatu du.