Heldu den abenduaren 14an, gaztetxoen nerabezaroa hizpide izanen dute Arantzan, herriko Guraso Elkarteak, eskolak eta Bortzirietako Gizarte Zerbitzuen Mankomunitateak antolatu duten Guraso Eskolan.
Saioa 16:00etatik 17:30era eginen dute Baskulan, eta gurasoez gain, Toki-Ona institutuko eta Arantzako eskolako orientatzaileak, Lesakako Osasun Etxeko pediatriako erizainak eta Bortzirietako Gizarte Zerbitzuko hezitzaileak bilduko dira.
Nerabezaroaren garaiak gurasoengan sortzen dituen kezkak, eta fase honek alaba-semeetan dakartzan aldaketen aitzinean prestatzeko azalpenak partekatuko dituzte.
Guraso Eskolara joan nahi duenak 948 635036 telefonora deituz edo ssb@lesaka.eus e-postara idatziz eman dezake izena.