erran.eus

Igantzin Kultur Egunak abenduaren 6an hasiko dira

  Gizartea  Bortziriak  Igantzi

Euskara Batzordeak antolatutako Abenduko Kultur Egunak abenduaren 6tik 10era bitarte ospatuko dira. Motibazio tailerraretik Mugaldekoak taldearen Galdemoduen trilogia azken diskaren aurkezpena bitarte, ekitaldiz betetako egunez gozatzeko aukera izanen dute herritar eta bisitariek.

Abenduaren 6ko arratsaldeko motibazio tailerrarekin hasiko dituzte. Izan ere, batzordearen aspaldiko kezka da Igan­tzin euskara lehen baino gutiago erabiltzen dela, herritar ia guziek euskaraz jakinda ere egoera anitzetan ez dutela erabiltzen. Kezka hori herritar gehiagorekin elkarbanatzeko helburuarekin, tailer hau antolatu dute. Tailerra UEMAko teknikariek gidatuko dute, eta Bara­tzondon eginen da, 16:00etatik 18:00 arte. Interesa duen guziak parte hartzen ahal du, baina komeni da aitzinetik ba­tzordeko norbaiti abisa­tzea.

Igantzin Kultur Egunak abenduaren 6an hasiko dira
Ortzirale arratsaldean saskiari omen eginen diote. | Ikusi handiago | Argazki originala


Abenduaren 7an,  ortze­gun arratsaldeko 7etan, Eskolzarren, Bide eginez. Nafarroako Ikastolak 1969tik 1991 arte. Igantziko Ikastola izeneko solasaldia izanen da. Hizlaria Juan Luis Larraza izanen da. Larrazak orain­txe argitaratu du Bidea eginez liburua, eta bertan kontatzen du Nafarroako ikastolen lehen 22 urteetako ibilbidea. Akaso igantziar aunitzek ahantzia izanen dute, baina bertan ikastola izan zen, 1991. urtean sare pu­blikoan sartu zen arte. Ikastola ttiki haren nondik-norakoak oroitaraziko ditu Larrazak. 22:00etan, berriz, Mugaldekoak taldearen kontzertua izanen da, Baratzondon. Talde beratarrak bere azken diskoa, Galdemoduen trilogia, aurkeztuko du.

Abenduaren 8an, or­tzirale eguerdian kantu poteoa izanen da Mitxe­lena aita-semeekin, elkarte eta ostatuetan. Arratsaldea, berriz, saskiari omen egiteko izanen da. Badira hama­bortz urte herriak omenaldi bikaina egin ziela herriko saskigileei eta, orokorrean, saskigintzaren lanbideari. Garai hartan orain­dik zenbait saskigile lanean ari ziren, baina gaur egun dagoeneko inor ez da herrian lan horretan ari. Horregatik, ba­tzordeak berriz saskigin­tzarekin lotutako zenbait ekitaldi antolatu ditu, denak Bara­tzondon.
Arratsalde guzian saskia egiteko tresnen erakusketa izanen da, eta duela hamabortz urte egindako argazkiak ere ikusgai izanen dira. 16:00etan haurrentzako saskigintza tailerra izanen da. Jesusmari Garberekoa arituko zaie saskia nola egin irakasten.  18:00etan, Azken saskia dokumentala eskainiko da. Oier Fuentesen do­ku­mental horrek Euskal H­errian, Espainian, Afrikan, Errusian nahiz Quebec-en egindako festibaletan parte hartu du, eta hainbat sari jaso ditu. Hamar  minutuko dokumental ho­netan, Jesus Mari Sein agertuko zaigu, gaztainarekin saskiak lehengo eran egiten zituen azken nafa­rra. Ikus-entzunezko ho­rre­tan bere ofizioa eta bizi­tzaren errepaso bat egiten da, eta bere azken saskia egiten ikusten da, ogibi­de horren desagerpenaren arrazoien ingu­ruko hausnarketa bul­tzatuz. Eguna goxo aka­ba­tzeko, Biltokin opil jatea izanen da, 18:30etik aitzinera.


Abenduaren 9an, larunbat arratsaldeko 4etan hasita, haurren­tzako perkusio tailerra izanen da eskolan, Zo-zongó taldearekin, eta ondotik batukada emanaldia eginen dute he­rrian barrena. Akabailan haurren­tzako berendua ere izanen da. 21:00etan, helduentzako antzerki emanaldia izanen da Baratzondon. Ramon Agi­rre eta Inazio Tolosa aktoreek Putinen guardasola antzezlana eskainiko dute. Ray eta Nik musikarien paperean sartuko dira bi aktoreak. Lehendakariak euskaldun guztiak batuko dituen himnoa nahi omen du, eta musikari horiei egin omen die enkargoa.


Kultur egunei akabaila emateko, abenduaren 10ean igande eguerdian hasita herriko dan­tza taldearen emanaldia izanen da, herrian ba­rrena.

2017/12/06 - 2017/12/11

Igantzin Bortziriak Igantzi

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa