Harri naturala lantzen dute: «kareharria, Larungo harria, Baztango harri-gorria…» eta mota guztietako harrilanak egiten dituzte: «etxe eta igerilekuen estaldurak eta apaingarriak, lorategiak, tximinien dekorazioa, armarriak, grabatuak eta hilerrietarako gauzak».
Azaroaren 1a dela eta, lan aunitz izan dute azken asteetan: «nabari da jendeak santu guztien egunerako txukundu nahi izaten dituela bere senide eta lagunen hilobiak. Mota honetako lan eskaria igo egiten da sasoi honetan». Dena den, aitortu digunez, halakoetan ez dute inprobisaziorako tarte handiegirik izaten: «gurutze edo hilarriak egiten ditugu gehienetan eta herri bakoitzak dituen arauak kontuan hartu behar izaten dira. Hori bai, pieza bakoitza bakarra izaten da. Makineria harria xehatzeko soilik erabiltzen dugu, bertze guztia eskulana da». Merkatuari dagokionez, inguruan zertxobait lantzen badute ere, batez ere iparraldeko hilerrietan aritzen dira: «harri naturala gehiago lantzen da bertan. Gure eskualdean hilerriek bertze estetika bat dute».