URTERO BERRIKUNTZAREN BAT EGITARAUAN
Abuztuan sartuta, herriko bestak ditu orain buruan. Eta ez preseski parranda duelako buruan. Kultur zinegotzia izanda, bestak antolatzeko ardura duen batzordeko kideetako bat delako baizik: «ardura haundia da. Bestetan egun osoa telefonoari begira pasatzen dut badaezpada ere, eta jendeari ea gauzak gustatu zaizkien eta zertan hobe daitezkeen galdezka».
Urtarrilaz geroztik aritu dira besten antolakuntzan, eta dagoeneko «dena prest dugu. Bestak hasteko gogoarekin gaude», adierazi digu umoretsu. Hasi bai, baina bukatu ere...: «bestak ilusioz eta gogoz hasten ditut, baina baita bukatu ere», aitortu digu etxalartarrak.
20.000-21.000 euroko aurrekontua dute bestak antolatzeko, eta hortik zati haundiena Udalak ordaintzen duela azaldu digu Leirek. Hala ere, gaineratu digunez, «herriko elkarte eta taldeek ere ekintza dezente antolatzen dituzte beraien kontura: Etxalarko gazteak, Guraso Elkartea, dantza taldea, txistulariak, trikitilariak...». Hainbat boluntariok egiten duten lana ere nabarmendu nahi izan du. Eta horrela izan da aurten ere. Alde bateko eta bertzekoen elkarlanari esker, «jende guztiaren gustuko gauzak ekartzen saiatu» direla aipatu digu Olagaraik, «arrakasta duten ekintzak kendu gabe». Sosa omen da muga, baina hala ere, urtero zerbait berria ekartzeko ahalegina egiten dute: «aurten, Etxalarko eta bertze herrietako emakume talde batek dantza saioa eskainiko digute abuztuaren 18ko eguerdian». Horrez gain, aurten ere ez dute hutsik eginen Leireren irudiko, «aipagarrienak eta jendetsuenak diren bestetako ekitaldiek: bezperako herri afaria eta azken eguneko asaua». Hori da, gainera, berari gehien gustatzen zaiona: «Asau Eguna».
PARTE HARTZEKO DEIA
Garbi dio Leirek: «denen gustua egitea ezinezkoa da, baina ahalik eta gehien denok disfrutatzea nahi izaten dugu». Horregatik egin die herritarrei parte hartzeko deia: «nahiz eta dagoeneko jende aunitzek lagundu eta ideia berriak bota, bestak denontzat direnez, herritar gehiago animatuko nituzke bileretara eta antolakuntzari laguntzera, horrela, denon gustuko bestak ospatzeko».