Balkoi lehiaketa antolatu du berriz ere Lesakako Zerbitzuen Elkarteak ekainean

Ttipi-Ttapa 2017ko mai. 31a, 12:50

Ekainaren 23an jakinaraziko dute 200, 150 eta 100 euroko erosketa-bonoak irabaziko dituzten saridunak zein diren 

Lesakako Zerbitzuen Elkarteak, Lesakako udalaren eta Nafarroako Gobernuaren laguntzaz, laugarren urtez antolatu du Balkoi Loredunen lehiaketa ekainean. Ekainaren 23an jakinaraziko dute emaitza eta udalaren iragarki tauletan, prentsan, Elkartearen faceboo orrian eta Lesakako Udalaren www.lesaka.eus webgunean argitaratuko dute. Lehen saria, erosketa bonoetan 200 euro izanen da, bigarrena 150 euro eta hirugarrena 100 euro.  Bonoak gastatzeko epea uztailaren 5ean bukatuko da.

 

Epaimahaia Lesakako Zerbitzuen Elkareko kideak, Lesakako udaleko turismo teknikariak eta lorezaintza sektoreko profesional batek osatuko dute. Epaimahaiak, balkoiaren eta aitzinaldearen zainketa eta mantentze egoera, apainduren originaltasuna,konposizio floristikoa eta antolamendua, barietate, kalitate eta iraunkortasun floristikoa eta espezieen eta elementu osagarrien (lore-ontziak, zintzilikariak…) eraberritzea kontuan hartuko ditu.

Lesakako Zerbitzuen Elkarteak aipatu duenez, «lehiaketa honen bidez, agerian utzi nahi dugu balkoiak herriko elementu bizi bezala berreskuratzeak ingurunean onurak dakartzala; apaindutako balkoi bakoitzaren atzean karrika edo eraikin bat estetikoki hobetzea baitago; ingurugiroaren kalitatea hobetzea; eta, batez ere, auzokide-herri ingurune harremana hobetzea, norbere ekarpen artistikoa eginda pribatua den baina denok (auzokide eta turistak) gozatu dezakegun espazio bakarrari».

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun