Larunbatean 20:30 aldera eskainiko den emanaldiaren ondotik saskiaren zozketa eginen dute
Abenduaren 17an urteroko Eguberrietako kontzertua eskainiko du Igantziko Abesbatzak, larunbateko mezaren ondotik, 20:30ak aldera. Isabel Lacarrek zuzenduta dozena bat kanta abestuko dituzte, batzuk ezagunak direnak Igantziko zaleentzat eta lau kanta berri ere: Ildebrando Pizzettiren Agnus dei, Josu Elberdinen Izar ederrak, Michael McGlynn-en Maria Matrem Virginem eta Michael Dingnan-ek moldatutako Amavolovo afrikar kanta herrikoia.
Ilusioz prestatu dute saioa eta 2017ko hasieran kanpoan kantatzeko asmoa ere omen dute, urte gehienetan egiten duten bezalaxe. Urtetik-urtera nabaritzen zaie aitzinera emandako pausua eta aurtegoan ere seguru ederki pasatuko dutela bertara hurbiltzen direnek. Betiko moduan, maisuki lagunduko die Felix Txoperenak pianoarekin.
Urteroko moduan ere, saioa akautu ondotik eguberrietako saskiaren zozketa eginen da bertan.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.