Eguneko egitarauan ez da aldaketa handirik izanen. 12:30ean Meza Nagusia ospatuko da San Martin elizan. 13:30ean Aurreskua eskainiko zaie plazan omenduei. 14:00etan bazkaria izanen dute, aurtengoan Kasino jatetxean. Bazkalondoan, omenaldiak eginen dituzte. 17:00etan elkarteak antolatutako txapelketa ezberdinetako sariak eta trofeoak banatuko dituzte eta 17:30ean animatuenek dantzatzeko aukera ere izanen dute.
Omenduak
Aurten 85 urte betetzen dituzten pertsonak badira herrian, baina, arrazoi ezberdinak medio, bakar bat ere ez da animatu ortziraleko ospakizunean parte hartzera. Urrezko Ezteiak ospatzen dituzten senar-emazteen artean, Kontxita Telletxea eta Ramon Fagoaga izanen dira ortziraleko ospakizunean. Diamantezko Ezteiak, berriz, Garaiar baserriko Gloria Maia Anduezak eta Antonio Telletxea Espadak ospatuko dituzte.