Salbuespen izaten dira testu formatuan argitaratzen diren antzezlanak eta oraindik salbuespen handiagoa liburu gisa karrikaratzen diren euskarazko antzezlanak. «Hau kasu berezi bat izan da», aitortu du horregatik 1974an Lesakan jaiotako Gaizka Sarasolak.
Musikari eta aktore izanik, antzezlanaren doinua eta pertsonaien keinuak gogoan dituela idazten omen ditu beti testuak. Eskuak teklatuan, baina gogoan agertokia duela. Orain paperean bildutako hiru hauek baino lehen ere idatziak ditu antzezlanak Gaizka Sarasolak, 2004. urtean Euskara Mankomunitatearen beka jaso zuen Erregea, bufoia eta soldadua erraterako. Ondotik ere, iazko abenduan estreinatu zuen Bertso atabikoak edo Norena da basoa? antzezlana Mairu Antzerki tailerrarekin (argazkian).
Musika arloan, musika irakasle eta txistulari taldeko zuzendari ez ezik, esperimentazioa eta soinu berriak maite ditu Sarasolak eta Ixuriak (2004) eta Ez naiz deusen jabe (2007) diskak argitaratu zituen Xabier Erkizia herriko soinu-artistarekin elkarlanean.
