Ikasleek 100 euroko fidantza ordaindu beharko dute irailean, eta bueltan jasoko dute ikasturte bukaeran gutxieneko asistentzia betetzen badute. Zailtasun ekonomiko larriak dituzten ikasleen kasuan, 50 eurokoa izanen da fidantza.
Bi arrazoi nagusirengatik erabaki du euskara mankomunitateak ikasleei klaseak debalde eskaintzea: alde batetik, matrikulazioari bultzada eman nahi diote, inor bazter utzi gabe. Bertzetik, euskara ikastea herritar guztion eskubidea den heinean ez lukeelako ikasi nahi duenarentzat kostu ekonomikorik ekarri behar.
Hiru urteko probaldia ezartzea erabaki du Bortzirietako Euskara Mankomunitateak, eta sistema berriak ematen dituen emaitzen arabera erabakiko du aitzinera segitu ala ez. Ahalegin ekonomiko handia suposatuko du, edo hala nahiko luke mankomunitateak (herritar askok izena eman duten seinale). Horregatik, bortziritarrei inplikazio berezia eskatzen die mezua zabaldu dezaten, ingurukoei, dela lankide, bizilagun, senide, egitasmoaren berri eman diezaioten.
Alfabetatzean arreta berezia paratu nahi du mankomunitateak. Sarritan kanpainek euskalduntzeari baino ez diote erreparatzen, eta euskaraz ongi solastu baina idatzi eta irakurtzeko zailtasunak dituen jende aunitz dago Bortzirietan.
Ekainetik bertatik hasi da kanpaina egiten euskara mankomunitatea. Bortz herrietako euskara batzordeen bidez hasi da mezua zabaltzen, eta aurtengo Euskaltegiko ikasleekin ere izan dira heldu den urteko egitasmoa azaltzen. Udan zehar ahoz ahokoari esker ahalik eta jende gehienarengana iristea espero dute. Irailean sartuko dira matrikulazio kanpaina betean, berriz, bai IKA euskaltegia bai euskara mankomunitatea bera.
Alba Sistiagak prestatu du kanpainarako logoa. Bortz biribil berdeek bortz herriak irudikatzen dituzte, eta Bidasoa ibaiak zeharkatzen ditu. Ibai horrek markatzen du euskarara doan bidea. Hitz jokoa argia da, bide hori doan egiteko aukera izanen baitute bortziritarrek heldu den ikasturtean.