Kontzertuaren lehenbiziko zatian Errenteriakoek kantatu zuten eta bigarrenean denak batera aritu ziren, beti ere Elizasuren gidaritzapean eta pianoan laguntzarekin, abestiekin batera, koreografiak ere eginez. Lesakako Tantirumairu ikastolako eta Irain eskolako, Berako Jesusen Bihotza ikastetxeko, Igantziko musika eskolako eta Elizondoko Abesbatzako neska-mutikoak aritu ziren kantari. Kontzertu honetarako, hurrengo kantak prestatu zituzten elkarlanean, bi entsaiotan ahots lanketa, estilo ezberdineko obren interpretazioa, entsaio dinamika eta eszenatokiko lana landuz: Ku ku ué (Eva Ugalde), Non geratzen den denbora (Mikel Urdangarin), Nesio Hego (Afrikako kantu herrikoia), Dona Nobis pacem (Mary Lunn Lightfoot) eta Ipharadisi (Hego Afrikar herrikoia).
Kontzertuaren ondotik, gastuei aurre egiteko zozketa bat ere egin zen eta berendua izan zuten kantariek.
Giltzarri Abesbatzaren 20. Urteurrena
Giltzarri Abesbatzak 20 urte bete ditu eta hori ospatzeko, larunbateko topaketaz gain, bertze zenbait ekitaldi ere prest ditu. Honela, apirilaren 23an, XX mendeko musika koru tailerra eskainiko du Enrique Azurza, nazioarte mailan ospe handia duen abesbatza zuzendari eta irakasle tolosarrak. 76 lagunek eman dute izena eta goiz-arratsaldez ariko dira lanean Harriondoan.
Maiatzaren 7an, Espainiako Avilako Arenas de San Pedro eta Ainhoako Atsulai abesbatzekin topaketa eginen dute komentuko elizan, 20:00etan. Urte bukaeran ere bertze kontzerturen bat emateko asmoa dute, baina horren berri zehatza aitzinerago emanen dute.