Hika ikasteko, berreskuratzeko edo fintzeko interesa duen edonorentzat prestatuta dago ikastaroa; hutsetik hasten direnak ez dira galduko, eta lehenagotik zerbait dakitenek ere aunitz ikasiko dute. Gainera, irakasleak interesgarritzat jo du hika maila ezberdineko ikasleak talde berean egotea, batzuek bertzeengandik ikasi dezaten eta elkarri lagundu diezaioten.
Bortzirietako Euskara Mankomunitatearekin batera ibili da IKA euskaltegia elkarlanean, baina baita Solaslaguna programarekin ere; ikastaroari segida eman nahi diote antolatzaileek, Bortzirietan hikalagun taldea sortuz. Etorkizunean guttienez lagun talde bat astero elkartzea da asmoa, hika solasteko ohiturarik gal ez dezaten.
Ikastaroa Beran edo Lesakan emango da, eskariaren arabera. Izen-ematea martxoaren 22ra arte egonen da zabalik, eta 948 637 796 telefonora deitu edo bortziriak@ikaeuskaltegiak.eus helbidera idatzi bertzerik ez da egin behar. Ikastaroaren matrikula 40 eurokoa da eta %75eko asistentzia dutenei ziurtagiria banatuko zaie.
Inguruan aukera gehiago
Hika gero eta guttiago solasten delako kezka zabaltzen ari da inguruan, eta horren erakusgarri dira tenore beretsuan hemendik gertu eskainiko diren ikastaroak: Baztango AEK-k 10-12 laguneko bi talde atera ditu, eta Irungo AEKn 15 lagun inguru hasi dira martxoan 33 orduko ikastaroarekin.