Arantzako trikitilariez gain, Doneztebeko Agorreta, Berako Isidoro Fagoaga eta Lesakako udal musika eskolakoak; Etxalar eta Elizagoien ahizpak trikitilariak; Lesaka, Mendaur, Irats eta Xabi Urtasun Trikitixa eskolako ikasleak eta dantzariak ere igoko ziren taulara. Zehazki, Doneztebeko Erreka eta Azkoitia-Azpeitiako Sahatsa dantza taldekoak aritu ziren bi orduko saioan. Jendetzak bete zuen Arantzako frontoia.
Gregorio Mitxelenari omenaldi hunkigarria
Arantzako Udalak omenaldia eskaini nahi izan zion Gregorio Mitxelena herriko musikariari. Urtetan, akordiolari, txistulari, organujole eta atabalari izateaz gain, txistu eta irakasle ere izan da herriko hainbat gaztetxorentzat eta omenaldian aipatu zenez, «borondate izugarrizko gizasemea, belaunaldi ezberdinen kultur transmisioan zubi eta berritzaile handi».
Bi bertso eder kantatu zizkioten eta Igor Ugalde, udal kultur zinegotziak koadroa eta oroigarria eman zizkion opari, herriaren izenean. Ondotik, Beñat eta Andoni semeekin batera pieza bat jo zuen, entzuleen txalo zaparrada jasoz.
Bertze gainerakoan, asteburuan inauteriak ere giro ederrean ospatu dituzte Arantzan, ortzegunetik larunbatera.