Lesakako udal kiroldegiaren proposamenak arrakasta izan du, ehun lagun baino gehiagok eman baitute izena gaurgero, sei erronketakoren bat osatzeko. Otsailaren 1etik 29ra (inauterietako astelehena, otsailaren 8an izan ezik) honako aukera hauek izanen dituzte udal igerilekuan: Lesakako zubitik Endarlatsara (8 kilometro, igerilekuko 320 luze, 12 luze egunean); Lesakako zubitik Sunbillara (16 km, 640 luze, 23 luze egunean); Lesakako zubitik Legasara (23 km, 920 luze, 33 luze egunean); Endarlatsatik Legasara (31 km, 1.240 luze, 45 luze egunean); Behobia-Legasa (40 km, 1.600 luze, 58 luze egunean) eta Tren Txikitoren ibilbide osoa, Behobitik Elizondora (51,5 km, 2.080 luze, 74 luze egunean).