Zazpi bikoteren emanaldiaren ondotik, lore-xortak jaso dituzte Marisol Otxotekok, Laura Apeztegiak eta Jone eta Estitxu Elgorriaga ahizpek
Arrakasta handia izan zuen larunbatean Nafarroako Trikitixa Elkarteak eta Lesakako trikitixa taldeak bigarren aldiz antolatutako Trikiti jaialdiak. Harriondoa Kultur Etxea jendez lepo zegoen, aforo guztia beteta, eta zazpi bikoteren emanaldiaren ondotik, omenaldia eskaini zitzaien herrian trikitixa irakasle izan diren Marisol Otxoteko, Laura Apeztegia eta Jone eta Estitxu Elgorriaga ahizpei.
Iker Zubeldiak eta Iban Urdangarinek zuten emanaldian zazpi bikote aritu ziren: Iñaki Mendinueta eta Irune Agirre, Kristina eta Amaia, Epelde eta Lutxurdio, Agus Barandiaran (Korrontzi) eta Xabier Berasaluze (Leturia), Edurne Iturbe eta Oihana Irastorza, Jon Ostolaza eta Arnó eta Gari eta Iñaki. Euskal Telebistak ere grabatu zuen emanaldia eta laister eskainiko omen dute.
Ondotik, Irubiden egin zuten afarian kasik ehun lagun bildu ziren eta trikitia eta panderoa joz ibili omen ziren goizaldeko ordu ttikiak arte.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.