2015ean ere parkeko eskaintza ludikoa handitu duten zenbait berrikuntza egin dituzte. Horien artean, aipatzekoa da Ikaztegia, Ikatzaren Museoa, talde eta ikastetxeei eskaintzen zaien hezkuntza baliabidea. Udaberritik aitzinera IrriSarri Express trena dabil ordutegi ezberdinetan eta Disc Golf edo Baxiren bila bezalako jokuak ere estreinatu dituzte. Parkeko kantu ofiziala ere iaz aurkeztu zuten. Joan den urteko martxoan Gladiators Day bertan egin zen eta aurten ere Igantziko parkea aukeratu dute kirol proba gogor hau egiteko.
Baina otsailaren 12an abiatuko den denboraldi berriak berrikuntza gehiago ere izanen ditu eta horien berri emanen du Joxe Elgorriaga gerenteak urtarrilaren 21ean Fitur Ferian, espreski ekoiztu den spot baten bidez. Bertzeak bertze, 2016an eginen diren Zaldiaren Feria handia, Irisarriko bestak, Irisarri Sendiaren topaketa edo Ikaztegian gauzatuko diren ekintzak aurkeztuko dituzte. Gastronomia arloan ere berrikuntzak izanen dituzte IrriSarrin eta Nafarroako Ostalaritza Elkarteak antolatuko duen Basoaren, Ehizaren, Onddo eta Zizen Jardunaldietan parte hartuko dute.
Azpiegituren arloan, gaur egun erabilera anitzeko eraikin bat egiten ari dira, otordu handiak edo enpresa bilerak egiteko eta talde handiei aterpe emateko baliatuko dena.
Otsailaren 12ra bitarte publikoarentzat itxita badago ere, aldez aurretik eskatuta enpresa, talde eta ikastetxeek parkea erabil dezakete.