680 kiloko kategorian, Lesakako Beti Gazte izanen da eskualdeko ordezkari bakarra. Lesakarrekin batera, Ibarra (Gipuzkoa), Ñapurrak eta Zuraide (Lapurdi), Abadiño, Sokarri eta Murueta (Bizkaia) eta 6 Conceyos (Asturias) lehiatuko dira. Bi multzotan banatuak ariko dira, Abadiño eta Ibarra multzoburu direla. Multzo bakoitzak denek denen aurkako ligaxka bat eginen du eta multzoetako lehenbizikoak bertzeetako bigarrenen kontra ariko dira finalerdietan. Multzoetako hirugarren eta laugarrenek ere, bosgarrenetik zortzigarrenera arteko postuak erabakitzeko lehiatuko dira.
640 kiloko kategorian ere talde berak lehiatuko dira igandean. Hemen multzo bakarrean ariko dira, denak denen aurka eta sei lehenbizikoek jokatuko dute azken saioa urtarrilaren 23an Ibarran.
Emakumezkoetan, 540 eta 500 kiloko kategorietan, Ibarra, Gaztedi eta Badaiotz ariko dira.