Emanaldiaren aitzinetik, Jose Luis Sunsundegi eta Modesto Maia, Beti Gazteko presidenteak eta 75. Urteurreneko ekitaldien koordinatzaileak eskerrak eman zizkieten urte osoan zehar ospakizunetan lagundu eta parte hartu duten talde eta pertsonei. Hain zuzen, Beti Gazte eta Gure Txokoako futbol talde nagusien arteko partida antolatzen ari direnez orain, larunbateko kontzertua urteurreneko azken aurreko ekitaldia izan zen.
Soinulariek eta Abesbatzak elkarrekin Ansorenaren Agurra jo eta kantatu zuten eta gero, batzutan soinulariak bakarrik, bertzeetan Abesbatza bakarrik eta bertzeetan berriz ere elkarrekin aritu ziren. Gainera, Lesakako Musika Eskolako ttikien laguntza izan zuten Paulo Yanciren Lesaka eta Beti Gazteren himnoa eskaintzeko. Hain zuzen, duela 21 urte Beti Gazte elkarteak Alhondigako egoitza berria inauguratu zuenean estreinatu zuten Himnoaren euskarazko bertsioa. Feliciano Beobidek bere garaian egindako doinuari, Manolo Arozena bertsolariak jarri zizkion hitzak eta Joaquin Silguero musikariak egin zizkion moldaketak eta instrumentalizazioa. Musika bandako zenbait musikariren laguntza ere izan zuten emanaldian: Maria Pombar teklatu eta akordeoiarekin, Juan Antonio Burguete eta Mikel Arriola bonbardinoarekin; Xabier Arriola eta Julen Suarez tronpetarekin eta Juanito Ordoki tubarekin eta Joseba Bertiz perkusioarekin.