Alazne Untxalo iturendarrak eskuratu zuen bertso onenari emandako Kotto Saria, objektu bezala sorgin bat emanda egin zuen bertsoari. Bertsolariak ez ezik, gai-emaileak, epaileak eta musikariak ere Bortzirietako Bertso Eskolak jarri zituen (30 bat laguntzaile), eta urtero bezala eta giro ederra izan zen bai Arranoko afarian, 50 lagun baino gehiagorekin, baita kanporaketa ezberdinak jokatu ziren ostatuetan ere.
Txapelketa ortzira arratsean abiatu zen Beran, erakustaldi saioan aritu baitziren Berako Katakun Larungo Antenak (Patxi Castillo, Aitor Elexpuru eta Julen Zelaieta) eta Gorosterra ZU taldea (Iker era Egoitz Gorosterrazu anaiak eta Eneko Fernandez).
Larunbatean hasi ziren kanporaketak Lesakan. Teleboteko saioan, gerora txapeldun izanen zen Egarrittuk nagusitu zitzaion Bertze Balak taldeari (Xabier Terreros, Maddalen Lopez eta Jon Silveira). Antoiuko bazkalondoko saioan, Erratzu (Xabier Silveira, Alazne Untxalo eta Amaia Gorosterrazu) nagusitu zitzaion Dinosauriuk taldeari (Bittor Elizagoien, Manolo Arozena eta Joxe Juan Zubieta Etxabe), nahiz eta beterano hauek izan galtzaileen arteko puntuatuenak eta honenbertzez finalerdietarako sailkatu. Xarutako hirugarren kanporaketan Fashion Team gailendu zitzaion Berako Larungo Antenak taldeari.
Finalerdietako txandan, Haizeguan Egarrittuk taldeak irabazi zion Erratzuri eta Atsaspin, Fashion Team taldeak Dinosauriuk taldeari eta finalean, erran bezala, Egarrittuk txapeldun.