Arantza, Igantzi eta Lesakan abenduaren 24an izanen dute besta eguna eta Etxalarren abenduaren 31n. Arantza eta Etxalarko eskoletan, Igantziko Barazarrean, Lesakako Harriondoa Kultur Etxeko liburutegian eta Berako Beralandetan eskainiko dute Haur Txokoa.
Izen ematea Gizarte Zerbitzuen Mankomunitateko 948 635036 telefonora deituz edo ssblesaka@lesaka.net helbide elektronikora idatziz egin daiteke abenduaren 18ra bitarte, 15 euroko kuota ordainduta.
Zer da haur txokoa edo ludoteka?
Haur Txokoaren aurkezpenean, Bortzirietako Oinarriko Gizarte Zerbitzuen Mankomunitateko presidente den Migel Mari Irigoienek eta Jokin Apezetxea teknikariak aipatu zutenez, “Haur Txokoa da haurrek beren denbora librean kulturarekin eta harreman afektiboekin jostatzen eta gozatzen ikasteko gune bat, solidaritatean eta berdintasunean oinarritzen dena”.
Bidenabar, zerbitzu honen bitartez, gurasoei aukera bat ematen diete seme-alaben heziketa bateratu ahal izateko euren lanarekin edo denbora librearekin.
Bortzirietako haur txokoak koedukazioan ikasteko eta elkartzeko gune bat izan nahi du, eta bertan parte hartuko dutenak bultzatu nahi ditu, balore solidarioak praktikan jartzeaz gainera, errespetuaren eta elkar laguntzaren garrantziaz gogoeta egitera.