Hortaz, aurten ere SAREUSKAK mintzodromoa antolatu du Euskararen Nazioarteko Egunaren harira. Mintzodromoaren II. Edizioa Hondarribiko itsas Etxeko Auditorium-ean egingo da abenduaren 3an, goizeko 10:00 eta 12:30 bitartean.
Bertaratutakoak, tokian tokiko zein egunerokotasuneko gaien inguruan solastuko dira mahai baten bueltan lauko taldetxoetan eta giro xamur eta lagunartekoan. Hiru gai ezberdin proposatuko dira 15 minutuz mintzagai gisa eta hizketalditxo hauetariko bakoitza, lagun talde ezberdinarekin egingo dute. Ekimenaren dinamizazioaz Maider Segurola irrati esatari eta telebista aurkezlea arduratuko da, eta esparru ezberdinetako (kirol mundua, euskalgintza, bertsolaritza edo eta telebistako) pertsonaia ezagunek parte hartuko dute. Hau horrela, haiekin solasean aritzeko eta haiek ezagutzeko aukera ere izango da. Giroa eta partehartzea bultzatzeko, kafetxo eta mokadutxo baten aitzakia ere izango da
Ekimenaren helburua finean, euskaraz hitz egiteko aukera bat gehiago eskaintzea da, batez ere euskara ikasten ari direnei, praktikarako jauzia egin dezaten. Baina era berean euskaldunen arteko harreman sareak ehuntzea ere bilatzen da ekimenarekin Izan ere, Mintzodromoan parte hartu ondoren, bertan egindako lagun berriekin, euskaraz erlazionatzeko joera biderkatu baitaiteke. Eta modu honetan euskaldun zahar eta berrien arteko igurtziak areagotzeko aukerak ere.
SAREUSKAK mintzodromoan parte hartzeko deialdi berezia egin nahi die Bortziriak, Hego Lapurdi eta Irun-Hondarribiko euskaltegietako ikasle eta irakasleei eta baita ere mintzapraktika programetako partehartzaileei. Hala ere, ekimena guztiz irekia da eta edozein euskaltzaleri zuzenduta eta irekia dagoela azpimarratu nahi dute.