Biko Teatroak Desentxufatuak antzezlana eskainiko du igande arratsaldeko 7etatik aitzinera
Berako Euskara Batzordeak, Kultur Batzordearen eta Bortzirietako Euskara Mankomunitatearen laguntzaz antolatutako Kafe-Antzerki Zikloaren hamazazpigarren edizioaren baitan hirugarren eta azken emanaldia eskainiko dute azaroaren 22an, igandean 19:00etan Xuga ostatuan. Biko Teatroak Desentxufatuak lana eskainiko du.
Patxo Telleriak idatzitako antzezlana da, eta aktore lanetan ere aritzen da, Mikel Martínezekin batera.
Protagonistak bi euskara ikasle dira, «munduko euskaldunberririk zaharrenak», berrogei urte baitaramate euskaltegian. Publikoartera agertzen dira euren frustrazio, desio eta kexak adierazteko. Maitasun istoriorik ederrenetan bezala, euskara maite dute, eta gorroto. Gorroto dutelako maite dute; maite dutelako, gorroto.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.