Gaur egun zuzendaria den Bengt Ollének 1994tik dihardu Stockholms Musikgymnasiumen koru sailean. Bere koruek urtero hartzen dute parte nazioarteko lehiaketa eta jaialdietan, eta oso izen ona lortu dute soinu argi eta beroa, teknika ona eta eskarmentu handia dutelako. Bai eskolak bai bertako koruek, biek ala biek entzute handia dute Suediako musika-munduan, eta Stockholmeko Errege Orkestra Filarmonikoarekin elkarlana egiten dute urtero. Bengt Ollének Sofia Vocal Ensemble taldea zuzentzen du halaber; Europako koru prestigiotsuenetakoa da, eta, 1993 sortu zenetik, nazioarteko sari garrantzitsuenak lortu ditu Ollének haiekin. Ollén Göteborgeko Musika Eskolan prestatu zen. Stockholms-eko Musikgymnasiumean koruko eta koru-zuzendaritzako irakaslea ez ezik, Stockholmeko Musikako Udal Institutuko koru-zuzendaritzako irakaslea ere bada. Orobat, eskuarki parte hartzen du irakasle gonbidatu eta koru-zuzendari gisa jaialdi, tailer eta kontzertuetan, hala nazio mailan nola nazioartean.