Txapelketan izan den berdintasunaren seinale, burututako lau probetako bakoitzean irabazle ezberdina izan da. Kantabriako Santillana de Mar herrian uztailaren 4an jokatutako proban irabazle izan zen Iñaki Ubiria eta bertze hirutan (Naxeran maiatzaren 2an,Tierra Baños de Rioja-Villalobarren abuztuaren 22an, eta irailaren 20an Arnedon) bigarren. Hortaz, Larraintzarren egiten duena egiten duela txapeldun da lesakarra.
Agiñako VI. Igoera urriaren 31n
Lesakako motorzaleek zorionerako bertze arrazoi bat badute. Izan ere, 2007az geroztik ez zen rallyrik ikusi herrian, baina urriaren 31n eginen da Agiñako igoeraren seigarren edizioa, Nafarroako Mendi Txapelketa eta Nafarroako junior txapelketa jokoan izanen dituena.
Urriko azken larunbat goizeko 8:30etik 11etara eginen dituzte egiaztapenak. 14:00etan entrenamenduak hasiko dira eta ondoren lasterketako bi mangak. Sari banaketa 20:00etan eginen dute.