Partiden ondotik, Elutxa txaranga ibili zen karrikaz karrika eta elkartearen bandera haundi bat eraman zuten Beti Gazteko beteranoetako bik, Endika Lekarozek eta Kotte Iantzik, eta elkartearen egoitzara igo zuten. Elkartearen balkoitik, futbol zelaian bezalaxe, “75 urte eta oraindik Beti Gazte” zioen pankarta zintzilikatua zegoen. Goiz eta eguerdi parteko giroaren ondotik, 200 bat lagun bildu ziren Koxkontan bazkaltzera.
Urteko sariak
Bazkalondoan, orokorrean kategoria guztietan bikaina izan den denboraldiko jokalari erregularrenen sariak banatu zituzten. Endika Lekaroz berak eman zituen sariak. Kadetetan, Aimar Otxotekok lortu zuen saria; futbol 8ko nesketan Olaia Telletxeak; jubeniletan Joseba Bertizek, futbol 11ko nesketan Garaxi Mitxelenak eta ohorezko mailako mutiletan Igor Gurrutxagak. Horretaz gain, sari bereziak ere eman zituzten eta Mikel Arrolak Urrezko patata eraman zuen eta aurten ohorezko mailara igotzea lortu duten kadeteek ere sari berezia eman zioten Miguel Txoperena bere entrenatzaileari.
Bazkalondoa aunitz luzatu omen zen Beti Gazte elkartearen egunean.