Igantziko Udalak, heldu den ortzegunean, otsailaren 12an, arratsaldeko 7etan helduentzako hezkuntzari buruzko saio informatiboa antolatu du. Udaletxean bertan izanen da.
Bortzirietako, Malerrekako eta Baztango udalek, Gizarte Zerbitzuek eta Cerderna-Garalur-ek Nafarroako Gobernuko Hezkuntza departamentuan zonaldean helduendako hezkuntza zentro baten beharra azaldu zuten. Nafarroako bertze zonaldeetan bada horrelako eskaintzarik, eta gure zonaldea hau eskaintzen ez den bakarra da. Erantzuna baikorra izan zen eta ondorioz, Beran, Donezteben eta Elizondon gai honen inguruan hitzaldiak antolatu ziren, etxeetara triptikoak banatu ziren eta irratietan publizitatea egin zen. Orain udal bakoitzean saio informatiboak egiten hasi dira.
Saioan hurrengo gaiak jorratuko dituzte: helduen alfabetatzea, helduen ikaskuntza, moduloak, INEMen eskaintzen diren ikastaro eta lanetarako beharrezkoak diren ikasketak, gazte garaian utzitako ikasketak nola osatu, DBHko tituloak, oinarrizko konpetentziak.
Interesatuak daudenak bilerara hurbildu. Helduen Ikaskuntzarako zentroa zonaldean nahi badugu, jendearen inplikazioa behar da, izena eman eta parte hartu.
Informazio gehiago nahi duenak Udaletxera edota Gizarte Zerbitzuetara deitu.