Kulturartekotasuna, generoa, familia eredu berriak... Gisa honetako gai sozialak jorratzeko asmoz sortu dute Eneritz Rekarte eta Itsaso Alcaldek Anixe Elkartea. Lesaka eta Berako bi gazte hauek «gogo eta ilusio haundiz» paratu dute martxan egitasmoa, gaian hutsune handia dagoela iritzita. Azaldu digutenez, gai aunitz landu nahi dituzte, baina orain, batez ere haurrekin genero berdintasunaz ari nahi dute. Horren baitan, tailerrak, hitzaldiak, dokumentalak... eskaini nahi dituzte.
Gurutze PIKABEA
Zein da Anixe Elkartearen helburu nagusia?
Zonaldean ikusi dugun hutsune handi bat betetzea da gure helburua, batik bat, gai sozialak jorratuz. Eskualdeko jendearengana hurbildu nahi dugu, haur, gazte zein helduengana.
3-16 urte bitarteko haurrentzako genero berdintasuna lantzeko tailerrak antolatuko dituzue. Azaldu...
Hau lantzen pasatu dugu denbora gehiena. Eskualdean hutsune nabarmena dagoela somatu genuen, ez zegoela gai hau lantzeko aukera aunitzik. Haurren artean ere handitzen ari da mutilen eta nesken arteko ezberdintasuna. Gurasoek ere kezka hau azaldu digute eta tailerrak antolatzeko martxan jarri gara. Tailerrak adinaren arabera banatuko ditugu, lehenengo Haur Hezkuntzako haurrak, Lehen Hezkuntzan hiru talde eginen ditugu eta azkenik DBHko taldea. Haur eta Lehen Hezkuntzan gai berak landuko ditugu, baina zailtasun maila ezberdinarekin. Landuko ditugun gaien artean, kirola, lanbideak, etxeko lanak, jolasak, arropa... izanen dira. Tailerrak dinamikoak izanen dira jolas, antzerki, eskulanen... bitartez eginen ditugunak. DBHn, ordea, pil-pilean dauden eta hurbileko gaiak landuko ditugu, hala nola, ikasketen aukeraketa, genero indarkeria, mikromatxismoak, telesailak, kasu praktikoak, musika, biodeoklipak, iragarkiak, berdintasun planak... ikusiko ditugu.
Nola ikusten duzue genero berdintasunaren gaia eskualdeko haurren artean?
Landu beharreko erronka moduan. Kontzientzia falta handia dago, gizartean bertan arrotza da gai hau.
Zein dira haurrak berdintasunean hezteko oinarrizko gakoak?
Pertsona guztioi, jendarteratze prozesu sexista baten bidez, neska ala mutila nola izan irakasten digute. Jaiotzen garenetik gure gain espero diren espektatibak ikasten ditugu. Gure sexu berdina daukan jendea eredutzat hartzen dugu eta haiek egiten dituzten jokaera berdinak errepikatzen ditugu. Hezkidetza jendarte sisteman parekidetasuna lortzeko aukera da, gure sexu eta generotik at hezteko aukera, pertsona bakoitza gure banakotasun eta berezitasunekin heztea. Gaur egungo irizpide sexistak jarraitu gabe, gure sexuari egokitutako rolak, baloreak, portaerak... kontuan hartu gabe heztea. Pertsona autonomoak izatea, gure bizitza proiektuen jabe izanda, hurbileko inguruarekin elkarbizitzan egotea eta behar ditugun gaitasunak garatzea da helburua. Eskubide berdintasunaren ideologian oinarritzen da, askatasuna, ezberdintasuna eta elkartasuna gehituz.
Zer ez da egin behar?
Nahiko toleranteak gara. Hainbat espresio hagitz barneratuak ditugu. Nenaza bezalako espresioak edonon eta noiznahi entzun ditzakegu eta normalizatuak ditugu. Horrelako jarrerak behin eta berriz sortzen dira, diskurtsoaren gibeletik dagoenari erreparatu gabe.
Zuek nola landu nahi duzue genero berdintasuna?
Zoritxarrez, jendarte sexista batean sozializatzen ari gara eta haur zein gazteei bertze eredu bat eskaini nahi diegu. Horretarako, ezinbertzekoa da modu kontziente batean egitea. Berez ateratzen zaiguna, inongo filtrorik gabe, ez delako hezitzailea. Hortaz, generoaren betaurrekoak jartzera gonbidatu nahi dugu, errealitatea bertze modu batera aztertzera. Gure egitasmoan euskarak duen garrantzia ere azpimarratu nahiko genuke. Material gehiena gaztelaniaz eta ingelesez dago eta hau dena euskaratzeko lana hartu dugu, tailerrak, hitzaldiak... euskaraz eskaini ahal izateko.
EGIN BEHAR EZ DENA
«Hainbat espresio hagitz barneratuak ditugu. Nenaza bezalako espresioak edonon eta noiznahi entzun ditzakegu eta normalizatuak ditugu. Horrelako jarrerak behin eta berriz sortzen dira, diskurtsoaren gibeletik dagoenari erreparatu gabe».
HUTSUNE HANDIA
«Genero berdintasunaren gaian kontzientzia falta handia dago gure eskualdeko haurren artean, gizartean bertan gaia arrotza da».