Nafarroako 22 urtez beheitiko bigarren mailako eskuz binakako pilota txapelketaren finala jokatzekoa zuten azaroaren 29an Iruñeko Labrit pilotalekuan Bortziriak taldeko bi bikotek. Baina nahiz eta bi bikoteak Iruñera joan, Xabi Alkasena baigorriarraren osasun arazoak medio (ttikitatik urtean bitan edo izaten duen giltzurrunetako oinazearekin larrialdi zerbitzura eraman behar izan zuten), azken partida bertan behera gelditu zen eta jokatu gabe txapeldun suertatu ziren Andoni Lazkanotegi beratarra eta Joseba Aldabe igantziarra. Zorionez, dagoeneko etxean dago Baigorriko aurrelari bizia.
Xabi Mendi, Alkasenaren atzelariak ere jaso zuen finalistaren domina. Txapeldunaren dominak, berriz, (ezagutzen ez diren arrazoiengatik, txapelik ez baitzuten eman), Lazkanotegi eta Aldaberi eman zizkioten. Pilotariek kantxan erakutsi nahi zuten txapelketa osoan eskainitakoa, gainera ez da egunero Labrit pilotalekuan jokatzerik izaten, jende gehiago ikusten, prentsa…
Baina lehenbizikoa osasuna da eta oraingoan horrela suertatu da.