Larunbat honetan, abenduak 13, 19:30ean, Bortziriak. Uraren magaletik, euskararen bidean dokumentala Baskulan ikusgai izanen da. Dokumentala adineko jendeari 2006-2008 bitartean egindako grabazioetan oinarritua dago. Tartean aranztar gizon-emakume hauei egindakoak daude: Cornelio Ubiria, Dionixi Lazkano, Inaxi Iparragirre, Joxemari Ordoki, Juan Aginaga, Juanita Leiza, Koxme Larretxea, Martina Bergara, Norberto Elizondo, Panttaleon Errandonea eta Roman Iparragirre. Herritarren testigantza horiek (eta bertze lau herrietakoek), beuren bizitzako pasarteak gaur egungo bortziriarrek errekreatu dituzte dokumental honetan. Itsas amuarraina da protagonista eta lehengo eta oraingo kontuak lotuz, herri batetik bertzera errekaz erreka doa. Dokumentala Bortzirietako Euskara Mankomunitateak eta Labrit Multimediak elkarlanean egin dute. Larunbateko emanaldiaren ondotik, DVDa salgai egonen da.