Aitzineko urteetan Beran eta Lesakan egin ondotik, aurten Igantzin izanen da Euskaraz Bizi Nahi Dut lasterketa. Euskara Batzordea ari da antolatzen, eta lasterketa abenduko kultur egunetan eginen da, hain zuzen ere abenduaren 7an, igande goizez. Batzordea egitaraua lotzen ari da, baina eskualdean lasterka ari diren guztiek jakin dezaten, haur, gaztetxo nahiz helduentzako ibilbideak prestatzen ari dira. Lasterka abiatu baino lehen, ekitalditxo bat izanen da plazan, eta bukaeran ere bai, baita parte hartzaile guztientzako zozketak, jan-edanak, kamiseten salmenta….
AJOARRIERO TXAPELKETA ERE
Abenduko kultur egunetan ajoarriero txapelketa ere izanen da, abenduaren 8an, astelehen goizez. Igantziko Biltoki ari da hori prestatzen, eta jendea parte hartzera animatu nahi du. 12:00etan hasiko da lehiaketa, eta 13:00etarako ajoarrieroak prest egon beharko du. Bi modutara hartzen ahal da parte. Batetik, bikoteka, ajoarrieroa lehiaketarako prestatuz. Horretarako Biltokik parte hartzaile guztiei bakailua emanen die, eta 10 euro behar dituzten bertze gaiak erosteko. Parte hartzaileek ajoarrieroa prestatzeko behar dituzten tresna guztiak eraman beharko dituzte; mahaiak Biltokik paratuko ditu. Parte hartu nahi dutenek abenduaren 1a baino lehen izen eman beharko dute.
Bertze aldetik, gainerako herritarrek ere parte hartzen ahalko dute, ajoarrierorik hoberena zein den aukeratuz. Horretarako Biltokik nahi duen guztiari ajoarrieroak probatzeko aukera emanen dio, eta txartelean modu anonimoan paratuko dute zein den ajoarrierorik hoberena. Horrela erabakiko da zein izan den irabazlea.
Bukaeran sariak izanen dira ajoarriero lehiaketako irabazleentzat, baita zozketa bat ere botoa emanez parte hartu duten herritarrentzat.