Azaro hasieran, egun frexko eta bustiak izan badira ere, azaroaren lehenak udako eguna zirudien. XIX. Baserritarren Eguna aro ederrarekin izan genuen. Goiz guzian, herritar nahiz bisitari aunitzek ohiko bisita egin zuten herrira. Frontoian postuak ikusiz itzulixka egin zitekeen eta Guraso Elkarteak paratutako ostatuan tragoxka eta pintxoa hartu; plazan aziendak, Pelle-Ttiki Haur Eskolaren aldeko bigarren eskuko jostailuak...
Gazta eta ahari lehiaketak ere egin ziren. Hamar gazta aurkeztu zituzten eta lehen saria Tuanekobordako Marixol Almandozek jaso zuen; bigarrena Serorenbordako Margarita Madariagak; eta hirugarrena azken honen aitak, Simonenbordako Xalbadorrek hartu zuen. Bertze gaztak Albiz, Martinekoborda, Oskozenea, Senberro, Dani Lukanbio, Arrunekoborda eta Aientsako Gaxtelenekobordakoak izan ziren.
Ahari lehiaketan, bortz bururen artean, lehen saria Oskozeneko Leontxio Oskozen aziendak jaso zuen eta bigarrena Dani Lukanbiok eraman zuen. Xeberino Indakoetxeak eta Simonetik ere ahariak ekarri zituzten. Bazkal aitzinean zozketatutako zarea eta Marirenbordako oilarra Xabi Iturriak eraman zituen.
EKITALDI GEHIAGO
Kultur Egunen barne, urriaren 31n haurrentzat ipuinak eta helduentzat dokumentala izan ziren eta azaroaren 2an mus eta partxis txapelketak. Musean zortzi bikote aritu ziren eta Imanol Mitxelena eta Jon Jorajuriak irabazi zuten Luis Andueza eta Patxi Iturriaren kontra finalean. Partxisean hamaika bikote aritu ziren eta Edurne Gamio eta Rosa Mari Iribarren izan ziren garaile, finalean Aimar Zubieta eta Imanol Igartuari irabazita.
TUANEKOBORDAKO GAZTA 2. BERAN
Berako Lurraren Egunean egin zen gazta lehiaketan, Tuanekobordako Marixolek bigarren saria eskuratu zuen. Aipatu, Beran bizi arren, bere ahizpa Sokorroren gazta izan zela hoberena, lehen saria lortuz. Zorionak!