Behartsuei laguntza eskainiz, Arantza eta Igantziko Parrokiek zortzi urtez kolaboratu dute Behar-Bidasoa erakundearekin: janari-bilketak eginez, erabilitako arropak emanez, diruz lagunduz... Azken bi urteotan, arropa Iruñeko Gurutze Gorrira eraman dute eta orain, berriz, Paris 365 Gizakia Herritarrekin hasi dira elkarlanean, Iruñeko gizartean baztertuak diren behartsuei laguntzen dien fundazioarekin.
Erakunde honek egunero 70 laguni hiru otordu euro baten truke ematen dizkie, hamabortzero janari-saskiak banatzen ditu, aterperik ez dutenei salda beroa eta laguntza eskaini, laguntza juridikoa etorkinei, langabezian daudenei baliabideak, kultur arloan liburutegia, prentsa, ordenagailua eta internet, jokoak eta deskantsatzeko guneak eskaintzen ditu, haurrentzako prestakuntzarako programa... Etxerik gabe gelditzen direnei momentuko laguntza emateko bortz etxebizitza ere baditu eta lana lortzeko prestakuntza tailerra ere eskaintzen du.
Fundazioarekin elkarlanean Arantza eta Igantziko Parrokiak hasi badira ere, kolaboratu nahi duen bertze herrietako edozeinek ere parte har dezake, Iruñean edo bakoitzak bere herrian izena emanez. Gisa berean, etxe-tresna ttikiak, arropak, oinetakoak, poltsak, liburuak eta haurrentzako jolasak eman daitezke, Fundazioak dendan sal ditzan. Horiek eman nahi dituenak larunbatetan 10:00etatik 12:00etara Arantzan Puri Leizak Osiña karrikan duen garajera eraman ditzake, edo Igantzin Parrokiko Zentrora. Nahiago duenak 948 634030ra deitu eta etxetik pasako zaizkio bila. Diru-laguntza emateko aukera ere badago: La Caixan ES36 2100 2173 8502 0053 2487 zenbakian eta Rural Kutxan ES32 3008 0073 1130 2083 2923 zenbakian. Urtea bukatzean, laguntza eman duenari errezibo bat emanen zaio errenta aitorpenean dagokion deskontua izan dezan eta horretarako garrantzitsua izanen da diru-sarrera egiterakoan, izena, bi abizenak eta telefono zenbakia bankuan garbi jakinaraztea.
Aipatutakoez gain, abenduaren 13an, janari bilketa eginen dute Arantzan eta Igantzin Paris 365 Fundazioari laguntzeko.