Julio Caro Barojaren mendeurreneko ekitaldien baitan, erakusketa inauguratu zen urriaren 24an, ortziralean Kultur Etxean. “Don Julioren arrastoa” izenburupean, Julio Caro Barojaren mundua haurrei erakutsia agertuko du erakusketak, sorginak protagonista dituena. Julio Caro Barojak berak margotutako hainbat koadro ere ikusi ahal izanen dira, eta Berako ikastetxeetako ikasleek egindako marrazkiak bilduko dira bertan, ikus-entzunezko batekin batera. Erakusketa hau azaroaren 23ra arte bisitatu ahal izanen da, astelehenetik ortziralera 17:00etatik 20:00etara, eta asteburuetan 11:00etatik 13:00etara eta 17:00etatik 20:00etara. Bertze aldetik, Lurraren Egunaren ekitaldien baitan, Caro Barojaren inguruko argazki erakusketa ere prestatu zuen Rosa Errandoneak.
Azaroaren 9an, beratarrek antropologoarekin egiten zituzten bidaiak oinarri dituen Emaitza taldearen Los viajes de Don Julio antzezlana ikusgai izanen da Kultur Etxean, 18:30ean. Sarrera 3 euro izanen da.