Parkean egin daitezkeen espezialitateak ezagutzera emateko, Jai Bike bizikletaren festa antolatuko du asteburuan Igantziko IrriSarri Landek. Haur eta helduek hainbat jarduera probatu ahal izango dituzte, hala nola, gure inguruan berria den Four Cross modalitatea.
Four Cross-a mendiko bizikleta modalitate bat da. Jaitsierak eta BMXa bateratzen ditu, eta lau txirrindulari elkarren aurka lehiatzen dira jauzi eta oztopodun zirkuituan. IrriSarri Landeko Dirt Parkeko pistak jarduera hori praktikatzeko prestatuta daude. Horregatik, asteburuko programak haur eta helduentzako lasterketak barneratuko ditu. Parte-hartzaileek egunean bertan eman beharko dute izena, beti ere, Baxiko Tiketa edota eguneko forfaita erosita.
Baina parkeko Bike eta Jarduera arduradunek beste hainbat ekintza prestatu dituzte astebururako, hala nola, airbag erraldoia. Biker ausartenek jauziak eta itzulipurdiak probatu ahal izango dituzte, jarraian aire-poltsara erortzeko. Izan ere, airbag-ak trikimailuak minik hartu gabe entseatzeko aukera eskaintzen du.
Gainera, Dirt Jump eta Down Hill modalitateetan aritzeko aukera izango da (azken horretan mendian behera jaisten dira txirrindulariak, eta ibilbidea azkarren egiten duena da garailea). Parkeko arduradunek espezialitate horietako rider garrantzitsuak gonbidatu dituzte festara. Ikusle gisa joateako ez da sarrerarik ordaindu beharko.
Besta larunbatean eta igandean egingo dute, 15:00etatik 19:00etara. Larunbatean, 20:00etatik aurrera DJ Reagge Gaua ere eginen dute.