Juan Esteban Etxegarai Mikelperizena beratarrak eta Asier Etxeberria Arruti oiartzuarrak beraien bortz zakurrekin osatutako taldeak Espainiako erbi arrastoko Kopa irabazi dute Kantabriako Reinosan, Sajako Ehiza Erreserban jokatutako txapelketan. Galiza, Gaztela eta Leon, Asturias, Katalunia, Kantabria eta Euskal Herriko taldeek parte hartu dute txapelketan.
Berako Ehiza eta Arrantza Elkarteko Etxegaraik eta Oiartzungo Bizardia Elkarteko Etxeberriak hiru erbi-zakur eta bi sabuesorekin lehiatu zuten ordubeteko konpetizioan. Gisa honetako txapelketetan lehen aldia izan arren, garaipena lortu zuen taldeak 120 punturekin. Kantabriako Jose Gutierrezen taldeak 98 punturekin bigarren postua eskuratu zuen eta Asturiasko Juan Carlos Alvarezen taldea izan zen hirugarren.