Urriaren 5ean egin zen BCN Ironmanaren lehen edizioa Calellan (Bartzelona). 2.500 kirolarien artean, Bixente Igartzabal lesakarrak 241. postuan bukatu zuen sailkapen orokorrean eta 47. bere kategorian. Ironmanean bere markarik onena egin zuen Beti Gazteko kirolariak.
Izan ere, Kataluniako Ironman hau bukatzeko 9 ordu, 36 minutu eta 30 segundo behar izan zituen Igartzabalek. Hasierako 3,8 kilometroak igerian egiteko ordubete, 22 minutu eta 2 segundo behar izan zituen, bizikletako 180 kilometroak 4 ordu, 39 minutu eta 52 segundotan egin zituen eta maratoi lasterkaldia 3 ordu, 28 minutu eta 3 segundotan. Lanzarote eta Embrunmangoen ondotik, denboraldiko hirugarren Ironmana zuen Beti Gazteko lesakarrak, bere bizitzako hamahirugarrena.