XXXIV. aldiz Artzain Zakur Txapelketa egin zen irailaren 21ean. Aurten, gainera, leku berrian egin zen, Elustan eta Meakaunditik herrigunera ekarriz, jende gehiago bildu zen.
Guztien artean, Heletako Juan Mihura nagusitu zen, Gringo zakurrarekin (223 puntu). Mikel Aizpurua izan zen bigarren, Xuker zakurrarekin (220 puntu) eta Amaiurko Felix Irigoien hirugarren gelditu zen, Perla zakurrarekin (209 puntu).
Ondotik sailkatu ziren Mikel Garaiar Lukirekin, Pello Segurola Argirekin, Joxe Mari Istilart Lagunekin, Jorge Oteiza oronoztarra Arakilekin eta Aitor Tato Argirekin.
Sari banaketan, Lourdes Ibarluzea eta Imanol Retegi, alkate eta zinegotzia, Amets Inda Bertizko Partzuergo Turistikoaren ordezkari eta Mari Joxe Iparragirre Hiruak Bat Landetxe Elkarteko presidentea izan ziren.
XI. GAZTA LEHIAKETA
Artzain Zakur lehiaketaz gain, besten aitzineko asteburua ekitaldiz betea joan zen. Igande eguerdian, XI. Gazta Lehiaketa egin zen. Hamar gazta aurkeztu ziren eta horien artean, Antsoneberriko Enkarnita Etxeberriak aurkeztutakoak lortu zuen lehen saria. Bigarren saria Argarategaraiko Elena Retegik eskuratu zuen eta hirugarrena Argaratebereko Mari Jose Lizardik.
Artzain Zakur Txapelketaren ondotik, berriz, kankailuak eta buruhandiak Lesakako trikitixa taldearekin batera ibili ziren, eta gero, gazta eta opil dastaketan ere beraien musikarekin alaitu zuten giroa.