Duela 29 urte jaio zen Estitxu Almandoz Zala auzoko Arantxene baserrian. Orain bortz urte murgildu zen herri kirolean eta sokatiran, txinga eramaten eta giza-proban ere aritu da. Baina duela hiru urte, Oronoz-Mugairiko Gure Kirolen Kluban entrenatzen ari zela, Sunbillako Unai Bertiz eta Etxalarko Xabier Ariztegi Santxin ikusi eta harriarekin proba egitea gogoratu zitzaion. «Egia errateko lehenbiziko saiakerak ez ziren batere onak izan, ez dakizu harriari nondik heldu, nola altxatu, dena beltz ikusten duzu… Baina pixkanaka teknika hartzen joaten zara, hobetuz zoazela ikusten duzu, kilo gehiago altxatzen eta gustoa hartzen diozu», erran digu lesakarrak. Izan ere, teknikak garrantzi handia du harria jasotzerakoan.
Bertze kirolak probatu izanagatik, gaur egun kasik harri-jasotzeari bakarrik emana da Estitxu. Astean behin entrenatzen du Patxi Larretxearekin eta abuztuan egin zen Euskadiko txapelketa prestatzeko Astigarragako Javier Etxeberriaren laguntza ere izan zuen. Hain zuzen, herrietako bestetan eta bertze ekitaldietan hainbat erakustaldi eman baditu ere, Aian jokatutakoa izan da bere konpetizio ofizial bakarra eta hagitz ezberdina dela onartu du: «erakustaldietan lasaiago nengoen, hasieran bai baduzu urduritasun punttu bat, baina ez du txapelketarekin zerikusirik, hagitzez estres gehiago sortzen du konpetizioak, epaileak ere hor daude kontrolatzen eta errespetu gehiago sortzen du». Kontuan hartu behar da, kirolaririk ez zegoelako lau urte pasatuak zirela Euskadiko azken txapelketatik. Zehazki, 2008an eta 2010ean bakarrik jokatu dira emakumezkoen harri-jasotze txapelketak. Aurten bi lehiakide bakarrik izan dira eta lesakarra bigarren izan zen, 2010ean ere txapeldun izan zen Idoia Etxeberria oriotarraren gibeletik. Halere, Almandoz gustura gelditu zen egindako lanarekin: hiruna minutuko txandetan 12 altxaldi eman zizkion 87,5 kiloko zilindroari, 10 altxaldi 75 kiloko kubikoari eta 21 altxaldi 62,5 kiloko bolari. «Kubikoarekin zerbait gehiago egitea espero nuen, baina bi nulo adierazi zizkidaten, baina zilindroarekin eta bolarekin entrenamenduetan baino altxaldiren bat gehiago ere egin nuen», dio. Txapeldunetik urrun xamar gelditu zen arren, hobetzeko entrenatzen segituko duela adierazi digu eta horretarako konpetitzea ere garrantzitsua dela uste du lesakarrak: «espero dut datozen urteetan ere txapelketak jokatzea, konpetiziorik ez bada motibazioa ere ez baita berdina». Kirol honetan aritzera emakume gehiago animatzea ere gustatuko litzaioke, «bertze herri kiroletan hasten dira neskak, baina harriak errespetu gehiago sortzen du, ez dakit beldurra ematen dien edo lotsa edo ez dakite nora jo, baina egia da gutti ari garela». Alde horretatik, herri kirola gogoko duenak Oronoz-Mugairiko Gure Kirolen Klubera joan eta han ongi aholkatuko dutela aipatu digu.
100 KILOKO KOPA
Estitxu Almandozek harria gustuko du eta aitzinera begira ere horretan segitzeko asmoa du. Erraterako, Lesakako ferietan marka pertsonala egin nahi du, 100 kiloko kopa harria altxatuta. «Behin baino gehiagotan altxatua dut etxean, baina ikusi beharko plazan jasotzeko gai naizen. Harri ttikiekin fondo gehiago behar duzu, hiru minutuko txandetan ahalik eta aldi gehienetan altxatzeko, baina harri handiarekin, behin altxatuta ere kontent, ez da batere erraza», aipatu digu.
KONPETIZIOA
«Espero dut datozen urteetan ere txapelketa jokatzea, konpetiziorik ez bada motibazioa ere ez baita berdina»
ETXETIK PLAZARA
«Behin baino gehiagotan altxatua dut 100 kiloko kopa harria etxean, baina ikusi beharko plazan gai naizen. Harri ttikiekin fondo gehiago behar da, hiru minutuko txandan ahalik eta gehien altxatzeko, baina harri handiarekin, behin altxatuta ere kontent».