Unai Santamaria eta Nerea Amilibia izan ziren abuztuaren 1ean Manttalek antolatutako Berako lehen gau lasterketako garaileak. 120 korrikalari atera ziren eta ikusle aunitz hurbildu ziren ikustera eta animatzera 7,6 kilometroko ibilbidean.
Gizonezkoetan, Santamariak ibilbidea 32 minututan egin zuen, eta Alberto Barberena lekaroztarrak 40 segundo gehiago behar izan zituen bukatzeko. Podiumeko hirugarren koxka Lartaun Rodriguez donostiarrak bete zuen. Lehenengo postuetan zonaldeko hainbat korrikalari sailkatu ziren: Berako Ibai Iturria laugarren, Angel Pombar zazpigarren, Juan Luis Irazoki zortzigarren, Iñigo Lasaga etxalartarra bosgarren izan zen eta Imanol Lukanbio aranztarra hamargarren.
20 emakumek parte hartu zuten lasterketan, hauetatik aunitz Manttale taldekoak. Aiako Nerea Amilibiaren gibeletik, Lourdes Gomez de Segura arabarra eta Irene Almandoz beratarra sailkatu ziren.
Koadrilakako sailkapenean, Tirtilariak izan zen irabazle (Patxi Vila, Iñaki Pikabea eta Iñaki Odriozola). Bigarren Zirtzilak (Angel Pombar, Joseba Lasarte eta Angeltxo Aranibar), eta hirugarren Irungo Erlaitz.