Herriko gaztetxoenek bi hilabete pasatxoko oporraldia izan dute. Akautzear dira. Ortziral honetarako, motxila, liburuak, kuadernoak, estutxea, margoak, arkatza, zorrozkailuak, borragoma… eta bertze hainbat beharrezko gailu prest izanen dituzte.
Ttikienak, hiru urte aurten beteak edo betetzear dituztenak ere urduri. Mantala eta motxila jarri eta eskolara! Batzuk lehendik ere badakite zer den eguneroko martxa, Pelle Ttiki haur eskolatik heldu direlako… Baina hasierako egunetan, gurasoetatik banatzea… Tira, batzuk lehenxeago eta bertzeak geroxeago, egokitzen joanen dira. Eskolako guzientzat izaten baita ikasturte berria: bai ikasleentzat nola irakasleentzat ere.
Aurten, bederatzi haur joanen dira lehen aldiz eskolara: Maddi, Olaia, Iker, Iraia, Aritz, Oinatz, Ander, Larraitz eta Aroa. Azken urteetan, kopuru politeko taldeak daude eta hori pozgarria da.
Hilabete honetan, arratsaldeak libre dituztenez, haurren mugimendua nabariagoa izanen da herrian. Hurrengo alean, eskolari buruz datu gehiago emanen ditugu.