Uztailaren 31tik hasita irailaren 14ra arte zabalik dago Julio Caro Baroja antropologo eta historialaria omentzeko erakusketa Kultur Etxean. Caro Barojak Nafarroako Museo Etnologikoari emandako eta herriko baserrietatik berreskuratutako nekazaritzako lanabesak eta argazki zaharrak daude ikusgai. Asteartetik igandera (igande arratsaldez itxita) dago irekia, 10:00etatik 14:00etara eta 16:00etatik 19:00etara.
Udalak bisita gidatuak ere antolatu ditu ortzegunetan (18:00etan euskaraz eta 18:30ean gaztelaniaz) eta larunbatetan (12:00etan euskaraz eta 12:30ean gaztelaniaz).
Caro Barojaren omenez, organo, gaita eta txistu kontzertua ere antolatu dute irailaren 5erako. Josu Goia ariko da organoan, Mugarik Gabeko Txuntxuneroak txistua jotzen eta eurekin Sarako gaiteroak. Hamasei abestiko emanaldia eskainiko dute 20:00etan hasita elizan.