Herri batzuetako bestez gain, auzoko batzuetan ere bestak ospatuko dituzte asteburu honetan. Arantzako Eguzkialdea eta Igantziko Piedade auzoetan, erraterako, larunbata besta eguna dute.
Arantzako Eguzkialdeko bestak
Aurten ere egitarau ederra prestatu dute Arantzako Eguzkialdeko auzotarrek, bestak ospatzeko. Larunbat honetan, irailak 6, egin duten hitzordua. 13:00etan txupinazoa botako dute eta ondotik herri kirolen txanda izanen da. Donato Larretxea eta Joxe Mari Olasagasti aizkoran ariko dira, baina horiez gain, auzoko gazteak herri kiroletan ariko dira. Auzoko trikitilariak arduratuko dira giroa alaitzeaz. 14:30ean, berriz, herri bazkaria eginen dute, eta arratsaldean Beñat Mitxelena herritarrarekin dantzaldia izanen da. 20:00etan, berriz, pintxoak izanen dira jateko.
Igantziko Piedade auzoko bestak
Igantziko Piedadeko auzotarrek Iñarburuko gainean bazkaria eginez ospatuko dute urteroko besta. 14:30 aldera eginen dute bazkaria eta eguraldi txarra baldin bada, Biltoki elkartean eginen dute.