Nafarroako Herriarteko Pilota Txapelketaren historian, bere bigarren txapela jantzi du Berako taldeak. Duela 35 urte jantzi zuen lehendabizikoa, orduan Lizarrari irabazita, eta aldi honetan, uztailaren 5ean Iruñeko Labriten jokatu zen finalean Uharteren kontra nagusitu zen. Lau partidetatik hirutan gailendu zen Berako taldea.
Alebinetan, partida berdindua jokatu zuten Berako Asier Telletxea eta Josetxo Sesek eta Uharteko Oscar Jamar eta Gaizka Esainek. Azkenean, 16-18ko markagailuarekin beratarrak nagusitu ziren.
Infantiletan, erraz nagusitu ziren beratarrak. Beñat Ordoki eta Jonan Fagoaga lesakarrak aritu ziren Berako taldean eta Uharteko Unai Elizalde eta Unai Urizen kontra. 5-18 irabazi zuen lehendabiziko bikoteak.
Jubeniletan, bi aurrelarirekin aritu behar izan zuen Berako taldeak, finalerdietan bezalaxe. Beñat Mitxelena eta Andoni Lazkanotegik jokatu zuten, atzelari aritzen den Jon Olaizola eskuko minarekin zegoelako. Uharteko Joseba Sarasa eta Iñigo Larunbe izan zituzten arerio eta azken hauek 22-3 irabazi zieten.
Seniorren mailako partida erabakiorra izan zen. Oraindik ere lehen urteko jubenilak diren eta hala ere, txapelketako partida guztiak irabazi dituzten Ander Errandonea eta Iñigo Martinez izan ziren Berako ordezkariak. Uharteko Oier Loban eta Iosu Linzoainen kontra aritu ziren eta 13-22 irabazi zieten. Giro polita sortu zen Iruñeko Labriten eta Beratik hiru autobusetan eta autoetan joandako dozenaka eta dozenaka jarraitzailerekin batera ospatu zuten pilotariek garaipena. Herrira bueltan ere, Altzateko pilotalekuan herri bazkaria izan zuten.
ORAIN EUSKAL HERRIKOAN
Nafarroakoa irabazi orduko Euskal Herriko Herriartekoari ere ekin dio Berak, Hego Euskal Herriko bertze hiru herrialdetako txapeldunekin batera. Finalerdian Amurrioren kontra aritu da eta Araban hiru partidetatik bi irabazi zituen Berak. Asteburu honetan zuten itzulerakoa Eztegaran eta finalerdia gaindituz gero, Gernika edo Donostia esperoan izanen dituzte finalean.
TXAPELDUNAK
1970 Altsasu
1971 Oroz-Betelu
1972 LEITZA
1973 LEITZA
1974 Oroz-Betelu
1975 Oroz-Betelu
1976 Larraun
1977 Oroz-Betelu
1978 Larraun
1979 BERA
1980 GOIZUETA
1981 Larraun
1982 Lizarra
1983 GOIZUETA
1984 Larraun
1985 Lizarra
1986 GOIZUETA
1987 Iruña
1988 Larraun
1989 Iruña
1990 GOIZUETA
1991 GOIZUETA
1992 GOIZUETA
1993 Iruña
1994 Uharte Arakil
1995 Lizarra
1996 Lizarra
1997 Lizarra
1998 Lizarra
1999 Iruña
2000 BAZTAN
2001 BAZTAN
2002 Lizarra
2003 Lizarra
2004 Uharte
2005 Lizarra
2006 Lizarra
2007 LEITZA
2008 Uharte
2009 Iruña
2010 BAZTAN
2011 DONEZTEBE
2012 DONEZTEBE
2013 Iruña
2014 BERA